O subdelegado do Goberno en Ourense, Eladio Santos, instou hoxe a fortalecer os dereitos e liberdades da Constitución Española, lembrando que a Carta Magna é “un contrato que obriga ás institucións e Administracións públicas a garantir o benestar da cidadanía”.
Fíxoo durante o acto de conmemoración do 47º aniversario da Constitución, organizado pola Subdelegación do Goberno.
O 47º aniversario da Constitución destaca a defensa das liberdades en Ourense
A celebración incluíu a entrega dos premios do 41º Concurso da Constitución, ademais da actuación da Banda de Guerra da Brigada Galicia VII da BRILAT. Esta actuación serviu como homenaxe ao apoio prestado pola unidade do Exército de Terra durante a vaga de incendios que afectou a provincia o pasado verán.
Santos subliñou que a Constitución “é unha peza esencial da nosa democracia”, unha democracia “conquistada con moitas dificultades” e que “aínda hoxe non podemos dar por garantida”. Apelou á responsabilidade colectiva ante a aparición de “discursos de odio que sementan división e cuestionan principios básicos da convivencia”. Ante iso, defendeu que a Carta Magna actúa como “faro que nos lembra que a nosa forza reside na unidade, na diversidade e no respecto”.
Premios e recoñecementos
O certame anual da Subdelegación contou nesta edición con máis de 1.300 traballos presentados. Foron premiados 20 alumnos e alumnas da provincia polas súas creacións inspiradas no artigo 45.2 da Constitución, centrado na protección do medio ambiente.
Outorgáronse 10 premios nas categorías de Educación Infantil, Primaria e Educación Especial que recibiron un agasallo e un exemplar da Constitución. Outros 10 galardóns foron para estudantes de ESO, Bacharelato, FP de grao medio e Universidade, premiados cun bono cultural e tecnolóxico. Santos trasladou o seu agradecemento pola ampla participación e felicitou aos recoñecidos.
Tamén se entregaron as mencións especiais do aniversario, cinco delas vinculadas ao traballo realizado durante os incendios do verán. Os recoñecementos foron para o Quinto Batallón da UME, a BRIF de Laza, a Asociación de Agrupacións de Voluntarios de Protección Civil de Ourense, a Garda Civil de Ourense e o Xornal O Sil. Ademais, concedeuse unha distinción á asociación Aixiña, polo seu labor a favor da inclusión social e cultural das persoas con diversidade funcional.