O delegado territorial da Xunta en Ourense, Manuel Pardo, visitou a sede da Mancomunidade Terra de Celanova, beneficiaria da orde destinada a financiar a contratación de mulleres que sofren violencia de xénero.
A Consellería de Política Social e Igualdade destinou máis de 430.000 euros a 10 concellos e 2 mancomunidades da provincia no pasado ano.
Terra de Celanova recibe 45.000 € para contratar vítimas de violencia de xénero
No caso desta entidade supramunicipal, recibiu preto de 45.000 euros. Esta cantidade permitiu contratar dúas mulleres durante 12 meses para desenvolver servizos de interese xeral ou social no ámbito local.
Durante a visita, Pardo informou ao presidente da mancomunidade, Jaime Sousa, da nova convocatoria destas axudas. A mesma estará dotada con 2,5 millóns de euros e financiada con fondos do Pacto de Estado contra a Violencia de Xénero. O prazo para presentar solicitudes remata o 27 de febreiro.
A contía cobre ata 12 mensualidades do salario bruto, incluídas pagas extraordinarias e cotizacións á Seguridade Social a cargo da entidade empregadora.
Na última convocatoria foron beneficiarios os concellos de Celanova, Ribadavia, Bande, A Veiga, Carballeda de Avia, O Barco de Valdeorras, O Pereiro de Aguiar, Verea, Boborás e Barbadás, ademais das mancomunidades Terra de Celanova e Conso-Frieiras.