Durante as Xuntas de Área celebradas esta mañá no Concello de Ourense, o grupo municipal socialista advertiu de que as persoas maiores da cidade terán que esperar ata o ano 2026 para a ampliación do programa Xantar na Casa.
Este atraso atribúeno á “mala xestión” tanto do anterior executivo do PP como do actual goberno de Democracia Ourensana.
O PSdeG denuncia o bloqueo da ampliación de Xantar na Casa ata 2026
As edís do PSdeG explicaron que a ampliación a 100 prazas, aprobada por unanimidade do Pleno a iniciativa socialista, non estará operativa en 2025, tal e como estaba previsto. Na Xunta de Área de Benestar Social confirmouse que a addenda ao convenio coa Xunta de Galicia, imprescindible para incrementar o financiamento, segue sen asinar por parte da Administración municipal e da autonómica.
O impedimento, segundo se manifestou na reunión, son as débedas pendentes dende 2016, acumuladas no mandato do PP con Jesús Vázquez. Estes pagos deben aprobarse e recoñecerse extraxudicialmente no próximo Pleno para poder formalizar o acordo.
As socialistas lembran que xa antes do verán existían nove persoas en lista de agarda e todas as prazas estaban ocupadas, polo que consideran que a ampliación era “urxente e imprescindible” para garantir unha atención digna ás persoas maiores e dependentes. “É inaceptable que se condene aos nosos e nosas maiores a agardar ata 2026 para acceder a algo esencial como é Xantar na Casa. Levan anos deteriorando os servizos sociais e agora impiden ampliar un programa fundamental para a calidade de vida da nosa xente maior”, sinalan.
O PSdeG critica tamén que o Partido Popular “chega tarde” na súa recente denuncia sobre o estado dos servizos sociais, lembrando que apoiou modificacións orzamentarias que “non melloraron a atención social”. Para o grupo socialista, PP e DO comparten responsabilidade no deterioro dos servizos sociais e no aumento da pobreza en Ourense.
Por todo isto, o PSdeG reclama ao alcalde Gonzalo Pérez Jácome que resolva “de inmediato” as débedas pendentes e axilice os trámites para que a addenda se poida formalizar canto antes, evitando novos atrasos que perxudiquen ás persoas maiores e ás súas familias.