Antiq Auria, a Feira Internacional de Antigüidades de Galicia, abriu esta tarde as súas portas en Expourense cun particular “Black Friday”, no que os expositores ofrecen prezos especiais para animar ao público a adiantar as compras do Nadal.
A organización aposta por destacar que as antigüedades “están de moda” nestas datas. Lembran que cada vez máis persoas prefiren obxectos con alma, historia e carácter, moitas veces únicos e irrepetibles. O recente anuncio de Loterías de Nadal, centrado na compra dun artigo de segunda man, reforza esta tendencia.
Antiq Auria abre en Expourense cun ‘Black Friday’ de pezas únicas
A novena edición de Antiq Auria propón un viaxe pola memoria material. A mostra conta con pezas de arte sacro e pinturas dos séculos XVIII e XIX ata artigos das décadas de 1980 e 1990 e mesmo dos primeiros anos do século XXI. Medio cento de expositores de España, Portugal, Francia, Bélxica e Suíza poñen á venda máis de 30.000 obxectos. Existen pezas de todos os estilos e prezos nun evento organizado pola Asociación Memoria Antiga, en colaboración con Expourense e coa Deputación Provincial de Ourense.
A inauguración contou coa visita dunha comitiva institucional formada por representantes da Xunta de Galicia, da Deputación de Ourense, do Concello, de deputados autonómicos e de entidades empresariais, que percorreron a mostra e conversaron cos expositores.
Tras nove edicións, Antiq Auria consolídase como a feira de referencia en Galicia. A mostra destaca tanto pola variedade e calidade dos artigos como pola fidelidade dun público que acudiu desde primeira hora mantendo un fluxo constante de visitas ao longo da tarde. “Os verdadeiros afeccionados veñen o primeiro día, porque cada peza é única e este é o mellor momento para atopar as mellores xoias”, explican Gerardo Román e José Antonio Ferreiro, fundadores de Memoria Antiga.
O percorrido da feira inclúe tres grandes ámbitos:
- antigüidades con máis de 50 anos (xoguetes, teléfonos, reloxos, mobles, xoias, prata ou porcelana);
- unha área de coleccionismo con numismática, filatelia e obxectos militares ou relixiosos;
- e un espazo dedicado ao vintage, convertido nun referente para a decoración de fogares e negocios.
Gran subasta o domingo
O domingo 30 celebrarase de novo a gran subasta, a partir das 12.00 horas. Cada expositor cederá unha peza cun prezo de saída de 5 euros, unha oportunidade para adquirir artigos singulares a prezos accesibles. Na última edición, a maior poxa recaeu nunha talla relixiosa alemá do século XVIII que alcanzou os 200 euros, aínda que a maioría das pezas se adxudicaron por entre 15 e 30 euros.
A feira abrirá mañá sábado 29 e o domingo 30 de 10.00 a 14.00 horas e de 16.30 a 21.00 horas. A entrada custa 3 euros e é gratuíta para menores de 12 anos.