O subdelegado do Goberno en Ourense, Eladio Santos, mantivo unha reunión coa delegada do sindicato Venia, Aline Castro, para abordar as demandas dos profesionais da quenda de oficio.
O encontro tivo lugar na Subdelegación do Goberno e centrouse nas condicións laborais dos avogados e avogadas que prestan este servizo público esencial.
Eladio Santos ve “xustas” as demandas dos avogados de oficio
Durante a reunión, Castro denunciou que as tarifas que reciben estes profesionais están obsoletas e non se axustan ao traballo que realizan. Esta situación prodúcese a pesar de tratarse dun dereito fundamental como é a asistencia xurídica gratuíta. Lembrou, ademais, que os letrados e letradas están obrigados a prestar este servizo sen poder negarse.
Eladio Santos expresou o seu apoio ao colectivo, cualificando de “xustas” as súas reivindicacións e apelando á responsabilidade da Xunta de Galicia. “Este servizo representa o principio de igualdade ante a lei e é posible grazas ao compromiso e á vocación dos avogados e avogadas da quenda de oficio, polo que merecen unhas condicións dignas”, sinalou o subdelegado.
Desde a Subdelegación do Goberno instan á Xunta a abrir un diálogo co sector e a revisar as compensacións económicas. O obxectivo final é garantir a calidade do servizo e a dignidade dos profesionais que o sosteñen.
