O Concello de Barbadás completou a instalación dunha estación de bombeo na rúa Travesía de Piñor, co obxectivo de eliminar o uso de fosas sépticas e adaptarse ás esixencias medioambientais.
A actuación supón un paso clave na mellora da depuración de augas na zona, que era “un dos poucos lugares que quedaban sen saneamento”, segundo explicou a tenente alcalde e concelleira de Servizos Públicos, Victoria Morenza.
Barbadás instala unha estación de bombeo en Piñor para eliminar fosas sépticas
A responsable municipal lembrou que intervencións similares xa se executaron en puntos como Sobrado ou Outeiriño, e que continuarán noutras áreas do municipio para completar a rede de saneamento.
Pola súa parte, o alcalde, Xosé Carlos Valcárcel, salientou que esta obra representa “un avance medioambiental” e forma parte da estratexia local para cumprir a lexislación vixente e optimizar o uso dos recursos naturais.
A actuación foi incluída no Plan Provincial, co que o goberno local busca modernizar as infraestruturas e garantir un servizo eficiente á veciñanza.