O Centro de Información á Muller (CIM) de Barbadás puxo en marcha a súa Biblioteca Feminista, un proxecto aberto á cidadanía. Este proxecto combina o fomento da lectura coa sensibilización sobre as realidades que viven as mulleres.
Os libros, escollidos polo propio persoal do CIM, están dispoñibles para préstamo no centro. Só é necesario achegarse, seleccionar un título e cubrir unha pequena ficha cos datos persoais.
Barbadás lanza a súa Biblioteca Feminista para toda a cidadanía
“Pode vir quen queira e buscar se hai algún libro do seu interese”, explica Elisabet González, concelleira de Igualdade de Barbadás.
O fondo da biblioteca inclúe novelas, ensaios e cómics centrados no papel da muller na sociedade, a violencia de xénero, o acoso sexual, a prostitución ou o peso dos coidados no fogar. Entre as autoras destacan nomes como Carmen Martín Gaite, Chimamanda Ngozi Adichie, Cristina Fallarás ou Ledicia Costas.
O obxectivo é dar a coñecer a Biblioteca entre a veciñanza e ir ampliando progresivamente o seu fondo. Actualmente conta con preto de medio cento de exemplares. Segundo González, “a Biblioteca tamén ten un uso terapéutico entre as usuarias do CIM que viven situacións de violencia e vulnerabilidade, complementando a atención psicolóxica, social e legal que se ofrece no centro”.