O Pabellón de Os Remedios acolleu esta fin de semana, do 11 ao 13 de xullo, o Campionato de España de Ximnasia Estética de Grupo, un evento que reuniu en Ourense a máis de 500 deportistas de 30 clubs pertencentes a 10 federacións diferentes.
O Club Ximnasia Pavillón foi o organizador, xunto coa Federación Galega de Ximnasia (FGX), dun encontro que converteu a cidade nun referente nacional desta disciplina.
Ourense celebra o éxito do equipo júnior mixto no nacional de ximnasia
A organización contou coa colaboración de máis de 40 persoas voluntarias entre adestradoras, familias e membros do club. Ademais, desprazouse a Ourense un amplo equipo técnico da Real Federación Española de Gimnasia, incluíndo 15 xuízas.
A competición desenvolveuse en tres xornadas. O venres dedicouse ao montaxe das pistas, acreditacións e adestramentos oficiais. Na xornada do sábado tiveron lugar as fases preliminares, e o domingo celebráronse as finais de todas as categorías.
O club anfitrión, Escola Pavillón, participou con tres equipos. O conxunto sénior, formado por Sabela, Martina, Alejandra, Lucía, Aroa e Noa, acadou un meritorio sétimo posto no programa curto, quedando a un paso da final. Pola súa parte, as alevíns (Martina, Valeria R., Area, Alicia, Mara e Valeria V.), que debutaban no programa longo infantil 10-12, foron oitavas, deixando unha moi boa impresión.
Pero a gran alegría da fin de semana veu da man do equipo júnior mixto. Este logrou clasificarse en primeira posición na súa categoría nas preliminares. O equipo júnior mixto revalidou esta posición o domingo para proclamarse campións de España en categoría júnior mixta programa longo. Este título supón un enorme recoñecemento ao traballo de todo o grupo.
Con esta exitosa participación, o club pon fin á primeira parte da tempada 2025 e desfrutará agora dun merecido descanso ata mediados de agosto, momento no que retomarán a preparación da recta final da campaña.