A serra do Larouco, entre os concellos ourensáns de Baltar e Cualedro, converteuse esta fin de semana no epicentro do parapente de precisión en España.
Durante tres xornadas, celebrouse alí o Campionato de Precisión España e de Galicia 2025, unha cita que reuniu a 29 participantes de cinco países —España, Alemaña, Portugal, Arabia Saudí e Bulgaria— nun escenario único para a práctica desta disciplina.
O parapente de precisión enche de cor os ceos da serra do Larouco
O Campionato de España e Galicia 2025 reuniu a 29 pilotos de cinco países na serra ourensá, con espectaculares voos entre Baltar e A Xironda.
Organizado polo club VooLarouco, xunto cos concellos de Baltar, Cualedro e Xinzo, e coa colaboración da Real Federación Aeronáutica Española, a Federación Aeronáutica Galega e a Xunta de Galicia, o evento desenvolveuse en condicións meteorolóxicas ideais, que permitiron completar 10 mangas ao longo das tres xornadas.
A proba destacou pola súa diversidade xeracional e de xénero: desde un rapaz de 15 anos —que xa fora segundo na edición anterior— ata un veterano de 66 anos, pasando por cinco mulleres que competiron no cadro internacional feminino.
O podio internacional (Open) estivo copado por representantes españois:
🥇 Víctor Rodríguez Santamarta
🥈 David Contreras Lázaro
🥉 Víctor Aguilera Lozano
No campionato galego, os mellores foron:
🥇 Diego Pimentel Villar
🥈 Juan Carlos Álvarez
🥉 Jaime Fonte Vázquez
No apartado feminino internacional, a gañadora foi Matin Afzalnia (Alemaña-Irán), seguida por Azahara Velasco (España) e Nehal Alhilal (Arabia Saudí).
O parapente de precisión é unha disciplina recoñecida pola Real Federación Aeronáutica Española. Consiste en despezarse dende un punto elevado e aterrar cun pé no centro dunha diana no chan. A puntuación mídese en centímetros desde ese punto, sendo gañador quen máis se achegue ao centro ao longo das distintas mangas.
O evento incluíu tamén prácticas dun curso de xuíces, do que saíron formados seis novos árbitros. A dirección da competición estivo a cargo de Virginia Gabriela Neagoe, mentres que Miguel González Cuesta exerceu como xuíz xefe e Ana Belén Lozano Aguilar como xuíz de evento. En total, nove xuíces velaron polo cumprimento estrito da normativa ao longo do campionato.