O CB Athlos completou unha fin de semana sobresaínte tanto no GALICIA TOP TTR San Martiño Ourense Senior, celebrado no CEIP Mestre Vide, como no Campionato de España Sub11 e Sub19, disputado en Huelva entre o 21 e o 23 de novembro.
Os deportistas de Athlos conseguiron múltiples podios e actuacións destacadas que consolidan o seu excelente momento deportivo.
O CB Athlos suma medallas en Ourense e no Nacional de Huelva
Gran actuación no TTR San Martiño de Ourense
Durante o torneo autonómico do sábado 22, o club sumou un elevado número de medallas grazas ao bo papel de Dolores M. Sarmiento, M. Nuria Fernández, M. Felisa Redondo, Milagros Chao, Mélani Vázquez, Fco. Javier Galicia, Xulio González, Jorge Vidal e Julio Fernández.
Os ouros chegaron en cinco modalidades:
- Milagros Chao e Mélani Vázquez proclamáronse campioas no dobres feminino A1-A2-B2.
- Mélani Vázquez sumou ademais o ouro no individual feminino A1-B1.
- Dolores Sarmiento, xunto a Marta Castro do CB O Cembedo, venceu no dobres feminino C1-C2-D.
- A propia Mélani Vázquez, facendo triplete, conquistou o dobres mixtos A1-A2 con Roberto Iglesias (CB Mestre Vide).
- Dolores Sarmiento e Fco. Javier Galicia subiron ao máis alto do podio no dobres mixtos C2-D.
Tamén houbo varios subcampionatos:
- Dolores Sarmiento no individual feminino C1-C2-SV.
- Fco. Javier Galicia no individual masculino C2-D.
- Julio Fernández, prata no individual masculino SV+ e no dobres masculino D-SV+ xunto a Ramón Quiroga (CB Cíes).
Completou o medalleiro o bronce de Xulio González no individual masculino C1, así como o terceiro posto de Milagros Chao e Xulio González no dobres mixtos B1.
Éxitos tamén no Campionato de España Sub11 e Sub19
En Huelva, o CB Athlos acudiu cunha ampla expedición formada polos Sub11 Sabela López, Alén Álvarez e Leo Álvarez e polos Sub19 Martina Llamas, Beatriz López, Mariña González, Lucía Cid, Paula Casas, Xoel Álvarez e Gael Rodríguez, acompañados polos adestradores Sara Galicia e Antonio Iglesias.
O resultado máis destacado chegou coa brillante actuación de Xoel Álvarez, que se proclamou subcampión de España Sub19 en dobres masculino xunto a Adrián Rodríguez (CB As Neves). Un logro de gran valor ao ser ambos xogadores de primeiro ano da categoría júnior.
Tamén foi salientable o quinto posto de Alén e Leo Álvarez no dobres masculino Sub11, unha clasificación que confirma a progresión da canteira do club.
O CB Athlos subliñou o esforzo de todo o conxunto Sub19, lembrando que non é doado acadar praza nun campionato onde só compiten os 32 mellores xogadores individuais e as 18 mellores parellas de dobres do país.