O CB Athlos pechou unha intensa fin de semana deportiva con dúas citas destacadas a nivel estatal: o Campionato de España Sub13, celebrado en Cartagena entre o 5 e o 7 de decembro, e o Máster Senior N4 “Ciudad de Toledo”, no que o club obtivo un brillante resultado.
CB Athlos: aprendizaxe en Sub13
No torneo Sub13, participaron os xogadores Hugo Blanco, Ethan Busto, Daniel Fernández e Gabriel Sánchez, acompañados pola súa adestradora María Ezquerro.
A pesar de non superar a fase de grupos, o club destaca que o máis valioso foi “o traballo, a entrega e as ganas demostradas en cada punto”. Salientan que a cita deixa “aprendizaxes, experiencia e motivación para seguir medrando”.
Dolores Sarmiento dá o ouro ao CB Athlos en Toledo
Mentres, no Máster Senior N4 “Ciudad de Toledo”, disputado tamén esta fin de semana, a entidade celebrou unha medalla de ouro grazas ao gran desempeño de Dolores M. Sarmiento, que se impuxo na modalidade de individual feminino C2. Xunto a ela competiu tamén Francisco Javier Galicia, completando a representación do club neste evento estatal.
O CB Athlos pecha así unha fin de semana marcada polo esforzo, o crecemento e os bos resultados, consolidando o seu papel no bádminton nacional.
