A contaminación das augas da bacía do Limia será o tema central dunha charla informativa que se celebrará este sábado, 19 de xullo, ás 20:00 horas na Casa da Cultura de Xinzo de Limia.
A iniciativa está organizada por Auga Limpa Xa! e o Movemento Ecoloxista da Limia (MEL), que contan coa colaboración do Concello de Xinzo, que cedeu o espazo para o acto.
Expertos e veciñanza analizan en Xinzo a contaminación da Limia
Auga Limpa Xa e o MEL explicarán a sentenza do TSXG e pedirán medidas contra a gandaría industrial
A palestra abordará as consecuencias da sentenza do Tribunal Superior de Xustiza de Galicia (TSXG), que recoñeceu a vulneración de dereitos fundamentais pola inacción da Xunta de Galicia e da Confederación Hidrográfica Miño-Sil ante a grave contaminación das augas desta comarca ourensá. O fallo foi posible grazas a unha demanda promovida por colectivos veciñais e ecoloxistas.
Na charla participarán persoas directamente implicadas na loita pola defensa ambiental da zona, así como expertos do ámbito científico:
- Pablo Álvarez, portavoz das veciñas das Conchas (Lobeira)
- Eduardo Costas, investigador da Universidade Complutense de Madrid
- Serafín González, membro da Sociedade Galega de Historia Natural
- Manuel García, representante do Movemento Ecoloxista da Limia
Durante o encontro explicarase o alcance xurídico e ambiental da sentenza, e tamén se presentarán as principais demandas da veciñanza e dos colectivos ecoloxistas. Entre elas, destacan a aplicación dunha moratoria á expansión da gandaría industrial, a mellora na xestión de residuos agrícolas e gandeiros, e a implicación das autoridades sanitarias mediante a realización dun estudo que analice os posibles efectos da contaminación sobre a saúde da poboación.
Antes do comezo da charla, as persoas asistentes poderán asinar en apoio ao cumprimento efectivo da sentenza do TSXG e ás medidas que levan anos reclamando os habitantes da Limia e doutros territorios afectados pola mesma problemática.
📌 Datos do evento
🗓️ Sábado, 19 de xullo
🕗 20:00 h
📍 Casa da Cultura de Xinzo de Limia