A crise entre os comerciantes da Praza de Abastos de Ourense e o alcalde Gonzalo Pérez Jácome alcanzou nas últimas horas o seu punto máis crítico.
Isto suecede despois de que os praceiros fixesen pública unha contundente chamada aos grupos da oposición (PP, PSOE e BNG) para que impulsen unha moción de censura contra o rexedor.
Máxima tensión na Praza de Abastos pola orde de desaloxo
A petición chega tras a comunicación municipal de desaloxo das instalacións, un movemento que os vendedores consideran “o preludio do fin dun dos emblemas da cidade”.
Na súa declaración pública, os praceiros aseguran que só un acordo político inmediato pode “salvar a Praza e rematar con esta loucura”. Os comerciantes denuncian o desaloxo e reiteran que a oposición ten a capacidade de revertelo. Subliñan que a situación é “delicada e incerta” e que os máis de 200 traballadores do mercado viven un momento decisivo nas súas vidas profesionais.
O comunicado inclúe duras críticas ao estado da cidade e á xestión municipal: “O nivel de mediocridade, cutrerío e deterioro da nosa cidade é alarmante…”, afirman. Tamén insisten en que o apoio veciñal recibidos nestas semanas resultou esencial e apelan á responsabilidade cidadá á hora de elixir representantes públicos. Critican ademais a política de eventos do Concello, “unhas festas low cost (que sempre son a mesma festa con distinto nome)”. Tamén sinalan as avarías recorrentes en ascensores e rampas mecánicas.
Segundo destacan, “a situación pode mellorar a partir de mañá” se os grupos da oposición chegan a un acordo político. Lembran ademais que o conflito se atopa xudicializado e aseguran confiar en que “a xustiza poña as cousas onde deben estar”.
Resposta de Jácome: acusacións de “privilexios”, “okupas” e “incoherencia”
A reacción do alcalde non se fixo agardar e chegou nun ton especialmente duro. Jácome acusou os comerciantes de actuar como unha lobby político e ironizou coa situación: “¿Se imaginan al Corte Inglés pidiendo moción de censura por una licencia?”.
O rexedor afirmou que os vendedores da Praza “levan anos facendo competencia desleal” a outros establecementos da cidade. Asegura que estes últimos deben asumir gastos de alugueiro ou compra de locais, mentres que os da Praza desfrutarían de “privilexios” históricos. En palabras do alcalde, pedir a PP, PSOE e BNG que o cesen no cargo “para blindar os seus privilexios” supón “enseñar a patita”.
Tamén os cualificou de “jetas e okupas”, insistindo nas supostas vantaxes que manterían fronte ao pequeno comercio tradicional. No seu argumento engadiu críticas pola reclamación de accesibilidade: “Precisamente eles mesmos pediron ascensores extra e unha rampa de acceso directo… Os praceiros piden para os seus clientes o que non queren para a cidade. Critican o que piden. Piden o que critican.”