O VI Congreso Internacional de Turismo e Deporte celebrarase os días 11 e 12 de decembro en Expourense, nun encontro profesional vencellado a Sportur Galicia.
A asistencia é gratuíta, con inscrición previa obrigatoria na web sporturgalicia.com, e poderá seguirse de forma presencial ou virtual.
Profesionais de España e Portugal reúnense en Ourense polo turismo activo
O acto de presentación contou coa participación de representantes da Xunta, Deputación de Ourense, Concello de Ourense e Expourense, entidade promotora dun foro que reunirá 20 expertos de ambos países.
O programa estrutúrase en tres bloques temáticos con casos prácticos replicables:
- Accesibilidade e inclusión en destinos turísticos (xoves 11 pola mañá). Con achegas de Fundación ENKI, Portugal Accesible ou AGETAN.
- Financiamento deportivo (xoves 11 pola tarde). Centrado na captación de patrocinios e moderado polo profesor Patricio Sánchez.
- Foro “Concellos activos” (venres 12 pola mañá). Dirixido a municipios que promovan o turismo deportivo e de natureza, co exemplo de Benicarló como caso de éxito.
O congreso complétase cunha pequena zona expositiva e actividades paralelas: unha sesión informativa do programa Campus Rural (xoves 11, ás 12.30 h) e un obradoiro de primeiros auxilios impartido por TESGALICIA (venres 12, ás 10.30 h), con praza previa.
A cita marcará ademais o inicio da tempada deportiva 2025/2026 coa instalación da pista curta de atletismo cuberta, que acollerá probas ata marzo, e coa celebración dunha nova xornada escolar de atletismo do programa Xogade.