Oito concellos galegos acaban de asinar convenios de colaboración que permitirán desenvolver proxectos sociais, culturais, ambientais e de eficiencia enerxética vinculados á implantación de parques eólicos no seu territorio.
Esta iniciativa enmárcase nun proxecto de responsabilidade social local promovido pola empresa desenvolvedora das instalacións renovables, que asumirá o financiamento das actuacións.
Oito concellos galegos únense para impulsar o desenvolvemento local con fondos da eólica
Os municipios asinantes son Chantada, San Cristovo de Cea, O Carballiño, O Irixo, Boborás, Leiro, Ribadavia e Beariz, onde están proxectados os parques eólicos Agratrina, Agromaces, Sistesas, Ventoburgo e Xestiloi, actualmente en fase de desenvolvemento.
O obxectivo dos convenios é crear vínculos duradeiros co territorio e garantir que os beneficios derivados da produción enerxética reverta nas comunidades locais. A empresa promotora comprométese voluntariamente a destinar ata o 2,5 % dos beneficios xerados a actuacións de interese público. Esta inversión realizarase malia que a normativa non esixe unha reinversión mínima.
Entre as primeiras medidas previstas destacan a mellora de espazos públicos como parques, zonas de lecer e áreas recreativas, aplicando criterios de sostibilidade e eficiencia enerxética. Tamén se realizarán auditorías enerxéticas en instalacións municipais para reducir custos estruturais e optimizar o consumo eléctrico.
Os acordos inclúen tamén actuacións orientadas á conservación do patrimonio e á promoción da cultura. Prevese a recuperación de elementos históricos como túmulos megalíticos mediante accións de limpeza, sinalización e estudos arqueolóxicos. Así mesmo, impulsaranse eventos escénicos de proxección rexional, como a Mostra Internacional de Teatro.
Cada convenio terá unha duración de 30 anos, correspondente co ciclo de vida operativo dos parques eólicos. Este inclúe a creación dun Comité de Seguimento para avaliar o cumprimento e o impacto das actuacións pactadas. Ademais, priorizarase o emprego de recursos e provedores locais, co obxectivo de reforzar a economía de proximidade, favorecer a fixación de poboación e crear emprego nos concellos implicados.
A promotora dos parques sostén que esta estratexia responde ao seu modelo de desenvolvemento sostible centrado nas persoas e no territorio. Continuará asinando novos convenios en función da evolución dos proxectos, sempre en diálogo coas administracións locais.