As festas do barrio da Follateira provocarán importantes cortes de tráfico e modificacións nas liñas de autobús urbano durante esta fin de semana en Ourense.
As principais rúas afectadas serán a avenida Otero Pedrayo e a avenida Bos Aires, que permanecerán pechadas por tramos en diferentes horarios, co obxectivo de garantir a seguridade durante as celebracións.
Cortes de tráfico e cambios en autobuses pola festa da Follateira
O venres 9 de maio, a avenida Otero Pedrayo estará cortada dende as 21:00 horas no tramo comprendido entre a glorieta da rúa Villamil e Castro e a glorieta da rúa Iglesias Alvariño. Esta medida obrigará a desviar as liñas 9 (Curuxeiras–Mende) e C17 (Rabo de Galo–Mende) en sentido Mende, que circularán pola rúa Villamil e Castro, camiño da Seara, Canella da Costa da Vela e rúa de Torres.
Tamén o venres, a partir das 19:00 h, cortarase o tramo da avenida Bos Aires comprendido entre a rúa Iglesias Alvariño e a rúa Silveira. A liña 5 (Reza–Ceboliño) verase afectada en ambos sentidos e circulará pola avenida Otero Pedrayo e rúa Iglesias Alvariño como percorrido alternativo.
O sábado 10 de maio, o corte na avenida Otero Pedrayo repetirase no mesmo tramo, pero dende as 18:00 horas. A liña 9 manterá o mesmo desvío que o venres. Ademais, o tramo da avenida Bos Aires entre a rúa Iglesias Alvariño e a rúa Silveira pecharase dende as 16:00 horas ata as 08:00 da mañá do domingo. A liña 5 manterá o seu desvío pola avenida Otero Pedrayo e a rúa Iglesias Alvariño.
Finalmente, o domingo 11 de maio, a avenida Bos Aires volverá estar cortada no tramo entre Iglesias Alvariño e Silveira a partir das 16:00 h, mantendo o desvío da liña 5 por Otero Pedrayo e Iglesias Alvariño.
O Concello recomenda aos condutores evitar estas zonas durante os horarios indicados e utilizar vías alternativas, así como consultar os horarios actualizados do transporte público.