A Cabalgata de Reis de Ourense obrigará a realizar varios cortes de tráfico o vindeiro luns, 5 de xaneiro, segundo o dispositivo especial deseñado pola Policía Local de Ourense.
As restricións afectarán tanto ao barrio da Ponte como ao centro da cidade, con recomendacións específicas de itinerarios alternativos para minimizar as molestias á veciñanza.
Ourense prepara cortes de tráfico pola Cabalgata de Reis
O primeiro corte de circulación producirase ás 15:30 horas no barrio da Ponte.
Media hora máis tarde, ás 16:00 horas, activarase o segundo corte, que afectará ao acceso á Praza de Concepción Arenal e ao resto do percorrido da cabalgata: rúa do Progreso, Doutor Marañón e Praza Maior. A Policía Local aconsella evitar especialmente a rúa do Progreso, que permanecerá pechada na maior parte do seu trazado, desde Concepción Arenal ata o Xardín do Posío.
Itinerarios alternativos no primeiro corte
No corte previsto ás 15:30 horas, no barrio da Ponte, os vehículos procedentes das estradas de Vigo (N-120) e Madrid (N-525) con destino a Santiago deberán circular pola estrada de Monforte (N-120) e viceversa, ou empregar como alternativa Río Arnoia.
Os condutores que baixen pola Avenida de Santiago deberán desviarse cara á Avenida de Marín e a Ponte Nova.
No caso da estación intermodal, permitirase o acceso pola rúa Gómez Franqueira ata o centro de saúde, que será o itinerario máis próximo para chegar ás estacións. A este punto poderase acceder por Río Arnoia, pola N-120, pola Ponte Ribeiriño ou pola Avenida de Marín ata o Espazo Lusquiños. O regreso deberá facerse polo mesmo percorrido, xa que a entrada principal da estación, incluído o aparcadoiro e a vía de parada, permanecerá pechada ao tráfico.
Unha vez que a cabalgata cruce a Ponte Romana, a circulación no barrio irase restablecendo de forma paulatina, segundo se retire o valado de seguridade.
Restricións e rutas no centro da cidade
Desde as 16:00 horas, no segundo corte, a Policía Local recomenda evitar circular en sentido centro desde o Xardín do Posío ou acceder á rúa do Progreso desde o Pavillón de Deportes, a Avenida da Habana, Sáenz Díez, Xoán XXIII ou Parada Justel, xa desde os minutos previos ás restricións.
Como rutas alternativas, recoméndanse os itinerarios Barrio de San Francisco – Emilia Pardo Bazán – Habana – Curros Enríquez – Ponte Nova, ou ben Barrio do Couto – Ervedelo – Ponte Ribeiriño – Río Arnoia.