A 39ª edición do Día da Bici en Ourense obrigará a realizar cortes de tráfico en varias rúas da cidade o vindeiro domingo, 21 de setembro, segundo informou a Policía Local.
A actividade, que cada ano reúne a milleiros de participantes, terá un percorrido modificado debido ás obras na Avenida de Portugal.
Cortes de tráfico en Ourense polo Día da Bici
O itinerario partirá da Alameda e continuará polo Progreso, Avenida de Zamora, rúa da Saínza, Coruña, Progreso ata Pardo de Cela, Ponte do Milenio, Xesús Pousa, Eulogio Gómez Franqueira, Río Arnoia, avenida de Santiago, avenida das Caldas, Vicente Risco, Ponte Nova, Curros Enríquez, Sáenz Díez e Progreso, finalizando de novo na Alameda.
Cortes e restricións
Ás 10.00 horas cortarase a rúa do Progreso desde a glorieta de San Rosendo até a Avenida de Zamora, á altura da rúa da Coruña. Desde as 11.30 horas, o corte estenderase a todo o percorrido e ás rúas que conflúan con el.
Para minimizar as molestias, a Policía Local recomenda varios itinerarios alternativos:
- Norte–sur: pontes do Ribeiriño e da presa de Velle (Oira).
- Oeste–leste: Avenida da Ribeira Sacra (N-120).
- Leste–centro: rúas Emilia Pardo Bazán e Pena Trevinca.
- Zona sur (saída): rúas Marcelo Macías, Manuel Murguía, Rodríguez de la Passera e O Regato, ata a glorieta da Saínza.
- Zona sur (entrada): glorieta da Saínza, con dobre sentido habilitado para acceder ás rúas do Regato, Rodríguez de la Passera, Leiras Pulpeiro, Manuel Murguía e Marcelo Macías.
Ademais, entre a glorieta da Saínza e o aparcadoiro da residencia quedará dispoñible un carril específico para acceso a urxencias, con posibilidade de subida pola rúa Cruceiro Quebrado.