O Día de Rosalía celebrarase no Carballiño o luns 23 de febreiro cunha actividade cultural aberta á veciñanza na rúa Curros Enríquez.
A cita comezará ás 18:00 h diante de OZOCOgz, e combinará música, poesía e tradición popular arredor da figura de Rosalía de Castro.
O Carballiño celebra o Día de Rosalía
O acto incluirá recitado de poemas e actuacións musicais, ademais da degustación do tradicional caldo de gloria para as persoas asistentes. A propia Rosalía estará presente de maneira simbólica, acompañada por Manuel Murguía, grazas á colaboración da compañía Dar Trela Teatro, que dará vida aos dous persoeiros históricos.
A iniciativa contará coa participación de numerosas entidades culturais e sociais da comarca. Xa confirmaron asistencia:
- Asociación Cultural Terras do Arenteiro,
- Centro Sociocomunitario do Carballiño,
- Escola de Música Pulpo Beats,
- Pandeireteiras de Maside,
- Pandeireteiras Lumieira,
- Pandeireteiras As Faíscas,
- Asociación Cultural Beira do Avia (Leiro),
- Agrupación Cultural Avantar,
- Pandeireteiras do CPI Terras de Maside e
- Pandeireteiras OZOCOgz.
Con esta actividade, O Carballiño súmase ás celebracións que cada 23 de febreiro teñen lugar en toda Galicia para reivindicar o legado literario e social de Rosalía de Castro, figura central da cultura galega e símbolo do Rexurdimento.
