O subdelegado do Goberno en Ourense, Eladio Santos, presentou esta mañá, xunto ao xefe provincial de Tráfico, David Llorente, e ao capitán xefe do Subsector de Tráfico, Javier Barja, unha nova campaña da Dirección Xeral de Tráfico (DXT) para o control do uso do cinto de seguridade e dos sistemas de retención infantil (SRI).
O acto tivo lugar na Estación de Servizo de Bemposta, na estrada OU-105.
A DXT lanza en Ourense unha campaña de control do cinto de seguridade
A campaña, que se desenvolverá entre o 10 e o 16 de marzo, contará cun incremento dos controis por parte da Garda Civil de Tráfico e das Policías Locais de Ourense, O Barco, Xinzo de Limia e Trives. Ademais, instalaranse catro paneis de tráfico con cámaras de vixilancia para supervisar o cumprimento desta normativa.
Desde a reforma da Lei sobre Tráfico de 2022, a sanción por non utilizar estes sistemas de seguridade é de 200 euros e implica a perda de 4 puntos no carné para o condutor. En Ourense, só no 2024, perderon máis de 3.000 puntos por esta infracción, sendo a terceira causa máis frecuente, só por detrás do consumo de alcohol e drogas e o exceso de velocidade.
Eladio Santos destacou a relevancia desta medida, lembrando que o 20% dos falecidos nas estradas galegas o pasado ano non levaban posto o cinto. «Non se trata de sancionar, senón de salvar vidas», subliñou o subdelegado, insistindo en que o uso do cinto reduce á metade o risco de falecemento en caso de accidente e nun 77% en caso de envorco.
Pola súa banda, o xefe provincial de Tráfico, David Llorente, enfatizou a importancia do cinto como un dos inventos que máis vidas salvou. Ademais, alertou sobre a baixa utilización deste elemento en autocares, unha tendencia preocupante segundo os datos da DXT.
A campaña busca sensibilizar á poboación sobre a necesidade de empregar correctamente os sistemas de seguridade en todo tipo de vehículos, lembrando que a prevención é a mellor forma de salvar vidas nas estradas.