O subdelegado do Goberno en Ourense, Eladio Santos, enxalzou esta tarde o labor das empresas ourensás ao asegurar que “se souberon adaptar aos cambios e sobrevivir nun mercado global altamente competitivo”.
Así o indicou durante a presentación da mesa redonda Raíces e futuro: medio século de economía sostible en Ourense. Este é o último acto do ciclo de debate promovido pola Subdelegación do Goberno e para a Celebración dos 50 anos de España en Liberdade.
Ourense analiza medio século de economía sostible nunha mesa de debate
A sesión contou coa participación da directora da Cátedra de Empresa Familiar da UVigo, Elena Rivo; o director xeral de Grupo Revi, Julio Iglesias; e a xerente de Adegas Godeval, Araceli Fernández, nun debate moderado polo vicerreitor do Campus de Ourense, Javier Rodríguez Rajo. As e os relatores analizaron a evolución do tecido empresarial e dos sectores económicos máis representativos da provincia nas últimas décadas.
Santos salientou o respaldo do Goberno ás empresas, lembrando a chegada de 3.067 millóns de euros a pemes e autónomos a través do programa Kit Digital. Tamén destacou o impacto dos fondos PERTE, que están a impulsar “grandes proxectos transformadores”. “En momentos difíciles hai que estar ao carón dos que crean riqueza e o Goberno o leva facendo desde a pandemia, con medidas reais e protectoras”, subliñou.
O subdelegado agradeceu tamén a participación no ciclo 50 anos de España en Liberdade, iniciado o 15 de novembro. Este ciclo abordou ámbitos como a Transición, o xornalismo, o feminismo, a lingua galega ou a evolución empresarial.
Continúa a programación conmemorativa
A programación continuará mañá, venres 5 de decembro. Será coa obra Flores de España, da compañía Los Sueños de Fausto, ás 21:00 horas no Teatro Lauro Olmo do Barco de Valdeorras. O broche final chegará o sábado 6, ás 12:00 horas, co acto de homenaxe ao 47º aniversario da Constitución Española. Esta cita será no Auditorio Municipal de Ourense, onde se entregarán os premios do tradicional concurso escolar.