O Festival Internacional de Rebulir 2025 abriu esta mañá no Centro Cultural Marcos Valcárcel a súa 20ª edición.
A edición de 2025 contará cun programa que medra en compañías, actividades e coa creación dun novo premio, reforzando o seu carácter internacional e rural.
Ramirás acolle un Rebulir máis internacional
A programación, presentada polo director artístico e académico do FIR, Alexandre Sotelino, desenvolverase do 18 ao 20 de decembro, cunha gala final o sábado ás 19:00 horas no Polideportivo O Picouto, en Ramirás. Nese acto entregaranse os premios anuais.
Sotelino destacou o crecemento sostible do festival e o seu impacto cultural, turístico e económico no territorio.
No acto participaron representantes da Xunta de Galicia, da Deputación de Ourense, do Concello de Ramirás e de Abanca, que coincidiron en salientar o papel de Rebulir na proxección da cultura galega e na conexión entre tradición e diversidade cultural.
Nesta edición participarán 12 compañías —tres internacionais, tres estatais e seis galegas— e estréase o selo promocional “Feito no rural”. O programa inclúe exposicións, paneis universitarios e animacións de rúa en Celanova, antes da gala central.
Entre os Premios Rebulir da Cultura Galega 2025, o xurado recoñeceu a Malvela en Música Galega, a Cristina Castaño en Artes Escénicas e ao Programa Luar na categoría de Homenaxe. A novidade deste ano é o Premio Rogelio García Yáñez, que distinguirá aos emigrantes galegos en Euskadi polo seu labor de difusión cultural.