A cidade de Ourense conta xa coa súa primeira peña oficial do Deportivo da Coruña: Fronte Xurés, recentemente constituída de xeito legal e coa intención de converterse no punto de encontro de todos os afeccionados branquiazuis da cidade das Burgas e da súa contorna.
A sede da nova agrupación localízase na Cafetería Fiadeiro, na Travesía Portocarreiro nº 1, e xa está en marcha a campaña de socios para atraer a todos os seareiros do Dépor.
Nace en Ourense a peña deportivista Fronte Xurés
As persoas interesadas poden facerse socias contactando:
- a través das redes sociais da peña (@pdfrontexures en Instagram),
- no correo pdfrontexures@gmail.com,
- ou acudindo á sede durante os partidos do equipo coruñés.
Entre as primeiras actividades previstas, Fronte Xurés anunciou dúas citas destacadas:
- Magosto Deportivista, o sábado 16 de novembro ás 18:30 horas, coincidindo co partido Córdoba–Dépor, no que se repartirán castañas de balde; e
- Festa-cea de inauguración, o sábado 29 de novembro, tamén na Cafetería Fiadeiro.
Esta última comezará cunha quedada ás 18:30 para ver o encontro Albacete–Dépor, con sorteos e venda de material da peña. A xornada continuará cunha cea de irmandade ás 21:30 horas. O prezo da cea é de 25 euros e é preciso inscribirse antes do 26 de novembro.
Con esta iniciativa, Fronte Xurés busca consolidar un espazo de convivencia e apoio ao Deportivo dende Ourense, unindo a paixón polo equipo herculino coa tradición e o compañeirismo da afección galega.