O subdelegado do Goberno en Ourense, Eladio Santos, destacou hoxe o compromiso do Executivo coa recuperación do sector agrogandeiro da provincia.
Este apoio materialízase a través dunhas axudas de entre 1.500 e 10.000 euros aprobadas polo Ministerio de Agricultura, Pesca e Alimentación para os produtores afectados polos incendios do pasado verán.
Eladio Santos anuncia novas medidas de apoio ao agro ourensán
Santos visitou unha explotación gandeira en Montederramo que sufriu danos, acompañado polo alcalde, Óscar Diéguez, e o propietario, José González.
O representante estatal explicou que o Consello de Ministros aprobou a semana pasada un real decreto que regula a concesión directa destas axudas. Este decreto conta cun orzamento de 27 millóns de euros dos que se beneficiarán arredor de 4.000 agricultores e gandeiros. “Unha vez máis, o Goberno de España mobiliza recursos e adopta medidas eficaces para protexer ás persoas e paliar as consecuencias dun desastre”, sinalou Santos.
O subdelegado subliñou que a tramitación será automática. Os beneficiarios non terán que realizar xestións administrativas, co obxectivo de que os pagos se efectúen antes do 31 de decembro deste ano.
Fondos da PAC e apoio á competitividade
Ademais, Santos informou de que o Ministerio adiantará ata o 30 de novembro un total de 44 millóns de euros á Xunta de Galicia para o pagamento dos anticipos das axudas directas da Política Agraria Común (PAC) correspondentes ás solicitudes de 2025. “Estes fondos súmanse ás axudas para paliar os danos provocados polos lumes, para que o sector agrícola e gandeiro de Ourense continúe sendo competitivo grazas á negociación e ao esforzo inversor do Goberno de España”, apuntou.
Plan de prevención fronte á dermatosis nodular
Durante a visita, Santos abordou tamén a situación da dermatosis nodular contaxiosa tras a detección de casos en Cataluña. Indicou que o Ministerio puxo en marcha un plan de vacinación de emerxencia e investiu 660.000 euros na compra de doses para garantir unha resposta rápida e dispoñer de reservas de continxencia. “Aínda que non se detectou ningún caso en Ourense, é fundamental extremar as medidas de bioseguridade nas explotacións e no transporte de gando”, advertiu.
O subdelegado defendeu que o Goberno dispón dunha estratexia nacional sólida e dun seguimento exhaustivo para protexer o gando fronte ao avance do virus.