A Gran Cabalgata de Reis volverá percorrer as rúas da cidade o vindeiro luns 5 de xaneiro, organizada polo Concello de Ourense.
O evento contará cun amplo dispositivo de seguridade, accesibilidade e tecnoloxía. O obxectivo é que a rapazada poida gozar da visita de Melchor, Gaspar e Baltasar nunha das citas máis esperadas do Nadal.
Todo listo para a Cabalgata de Reis en Ourense
Os Reis Magos de Oriente chegarán á cidade en tren á estación da Ponte. Pouco antes das 17:45 horas, sairán ao exterior para saudar aos nenos e nenas e subir aos seus camelos, iniciando así unha tarde chea de ilusión.
Percorrido e horarios da cabalgata
A cabalgata dará comezo ás 18:00 horas desde a estación da Ponte e avanzará polas rúas Eulogio Gómez Franqueira, avenida das Caldas, Ponte Romana, rúa do Progreso e Doutor Marañón, ata rematar na Praza Maior.
Desde o Concello de Ourense aclárase que no treito final, correspondente á rúa Doutor Marañón e á Praza Maior, só accederán os figurantes a pé. As carrozas e vehículos de apoio, incluído o dos bombeiros, non entrarán nestes espazos para garantir a seguridade do público.
Dispositivo especial de seguridade e accesibilidade
O operativo incluirá tres puntos fixos de atención médica, situados ao inicio da avenida de Marín, na Praza de Concepción Arenal e na rúa Parada Justel. Ademais, habilitaranse tres zonas reservadas para persoas con mobilidade reducida (PMR): na estación de tren, na contorna dos antigos xulgados e na Alameda.
Por razóns de seguridade, o Concello lembra que queda expresamente prohibido o uso de paraugas colocados do revés para recoller caramelos, unha práctica que pode provocar accidentes.
Seguimento da cabalgata en tempo real
Como novidade tecnolóxica, a comitiva da Gran Cabalgata de Reis de Ourense irá xeolocalizada en tempo real. A cidadanía poderá consultar a posición exacta dos Reis Magos a través da app oficial do Concello de Ourense, facilitando así a planificación das familias e mellorando a experiencia do desfile.