A provincia de Ourense enfróntase a unha das peores campañas de incendios forestais dos últimos anos, cun impacto devastador sobre o medio natural, as aldeas e a economía local.
A páxina de instragram «Mundo Rural», analiza nesta entrevista as causas que alimentan o lume, as medidas que considera prioritarias para previlo e o papel que deben asumir cidadanía, administracións e sector forestal para frear esta crise.
Ourense en chamas: voces contra o avance do lume
Que factores naturais e humanos están detrás da maioría dos lumes que afectan aos nosos montes?
Con respecto aos factores, tanto naturais como humanos, pensamos que o máis notable é o abandono do noso territorio. É verdade que sempre houbo lumes pero as magnitudes están aumentando cos anos debido ao aumento de combustible. Agora parece ser máis sinxelo prender o chisqueiro que toda a burocracia que hai que realizar para poder ter animais na casa para autoconsumo, animais que se encargan de xestionar eses terreos e mantelos limpos, como sucedía no pasado. A mentalidade social cambiou pero segue existindo xente con ganas e forzas para tirar do sector primario e do rural aos que se lles está poñendo moitas trabas. Sen ir máis lonxe, nos levamos un mes esperando a que se xestione a cartilla de explotación para poder meter só dúas cabras.
Que medidas de prevención resultan máis efectivas para reducir o risco, tanto a nivel individual como colectivo?
Con respecto a medidas efectivas para previr o risco de incendios, as xa mencionadas de promover o sector primario para que a gandería e os terreos xestionados, de forma sostible, garanten o coidado e mantemento do terreo. Ademais de medidas individuais coma manter a maleza limpa ao redor dos núcleos de poboacións, garantindo un correcto coidado e mantemento das fincas privadas. Considerando tamén que todos os municipios, aldea por aldea (é dicir, personalizado), terían que ter un plan de actuación para estas situacións.
Como deberían actuar a poboación, as administracións públicas, as empresas forestais e as organizacións ambientais para previr e combater os lumes?
Consideramos que as administracións deberían ser máis estritas ca limpeza do terreo para garantir maior seguridade. Ademais de realizar queimas controladas durante o inverno nos montes para poder garantir terreos útiles para os gandeiros e que se conserven limpos.