O alcalde de Ourense, Gonzalo Pérez Jácome, valorou de forma moi positiva o desenvolvemento e a acollida do Magosto 2025.
Segundo destacou o rexedor, “foi un éxito tremendo”, tanto pola elevada participación cidadá como pola calidade das propostas gastronómicas e musicais.
Ourense celebra un Magosto “de éxito bestial” con máis de 10.000 asistentes
O centro histórico de Ourense converteuse durante a xornada no epicentro da celebración. As actividades realizáronse na Praza Maior, Bispo Cesáreo e rúa do Progreso, na contorna da Alameda. O alcalde detallou que se repartiron arredor de 2 toneladas de castañas, 1.200 tapas de callos, 700 racións de porco ao espeto e 2.000 chourizos asados. Ó mesmo tempo, a música enchía as rúas dun ambiente festivo e familiar.
As actuacións comezaron ás 18.00 horas coa formación Brañas Folk. Esta agrupación actuou acompañada de artistas convidados como Verónica Codesal, Pancho Álvarez, María Jorge e o grupo de gaiteiros “De pé feito”, coordinados por Gonzalo Abelairas. O broche final púxoo a Orquestra Olympus, cun concerto multitudinario na rúa do Progreso entre as 19.00 e as 22.00 horas.
“Foi un éxito bestial”, insistiu Pérez Jácome, quen estimou que máis de 10.000 persoas pasaron polo centro durante a celebración. O alcalde salientou tamén a evolución do Magosto nos últimos anos: “Non ten nada que ver cos magostos doutro tempo, que eran pequenos actos de reparto de comida. Agora é unha festa social moi importante e participativa, con propostas para todos os gustos. Levamos o San Martiño a outra dimensión”, concluíu.