O Open Nacional de Jiu Jitsu, celebrado o domingo 16 de novembro no pavillón Francisco Varcárcel de Villaviciosa de Odón, deixou un balance excepcional para o Club Ximnasio Marbel.
Os integrantes do Club Marbel regresaron a Ourense cun total de sete medallas grazas ao bo papel realizado.
Sete podios para o Marbel no Nacional de Jiu Jitsu celebrado en Madrid
O equipo Marbel estivo formado por Leire Carrera (-57 kg), Juan Seoane (-85), Benjamín Junior Iglesias (-77), Yago Nguyen Rodríguez (-85) e Rubén Córdoba (-94). A excepción de Yago, que competiu unicamente en Lucha, o resto afrontou as dúas modalidades: Lucha e Ne Waza, combate restrinxido ao chan.
Os resultados foron sobresaíntes. Yago Nguyen proclamouse campión en Lucha; Leire Carrera colleitou dúas pratas; Rubén Córdoba, outras dúas; mentres que Juan Seoane logrou prata en Ne Waza e bronce en Lucha. Pola súa parte, Benjamín Iglesias tamén mostrou un bo nivel competitivo. Estes resultados triplican os acadados na pasada edición, un salto cualitativo que consolida o traballo do club.
A expedición contou coa presenza no tatami do mestre Felipe Iglesias, seleccionador galego, que enlazou unha intensa fin de semana tras acompañar o sábado aos deportistas infantís en Castelló e o domingo aos seniors en Madrid. Unha “doce paliza”, segundo destacou o club, grazas ao excelente rendemento global.
A competición reuniu a deportistas de toda España nas categorías de Kyus, cinturóns de cor previos ao negro, e cintos negros.