Marisol Nóvoa foi recoñecida co Premio Clara Campoamor na súa vixésima edición, un galardón que distingue a traxectoria da empresaria e avogada ourensá como referente do liderado feminino no ámbito económico e empresarial.
O xurado acordou por unanimidade concederlle o premio a título póstumo, destacando a súa figura como “exemplo de compromiso, solvencia profesional e vocación de servizo público desde o tecido empresarial”.
Marisol Nóvoa, Premio Clara Campoamor 2026 a título póstumo
A decisión adoptouse este mediodía nunha reunión celebrada nas dependencias da Concellería de Igualdade, presidida pola concelleira Noa Rouco.
O xurado estivo integrado por Delfina Lage, da Comisión de Seguimento das Violencias de Xénero; Judit Vega, da Asociación Española Contra o Cancro en representación do Consello Municipal da Igualdade; Ana Pérez, educadora do CIMM; e Elena Cid, funcionaria municipal, que actuou como secretaria.
Na acta do fallo, o xurado salienta a contribución “decisiva á normalización da presenza feminina en órganos de dirección ocupados tradicionalmente por homes”. Lembra tamén que Marisol Nóvoa foi a primeira muller en presidir a Confederación Empresarial de Ourense (CEO), un cargo que asumiu no ano 2019 e que marcou “un precedente histórico no liderado empresarial provincial”.
O texto do acordo subliña que, “aínda que a súa traxectoria non se desenvolveu desde o activismo feminista en sentido estrito, a achega de Marisol Nóvoa Rodríguez á igualdade de xénero resulta indiscutible desde unha perspectiva estrutural e simbólica”. Neste sentido, o xurado destaca a rotura do teito de cristal que supuxo o seu acceso e consolidación nun posto de máxima responsabilidade nun ámbito historicamente masculinizado.
“Con este logro, deu visibilidade ao liderado feminino no mundo económico e contribuíu a crear referentes reais e próximos para outras mulleres empresarias e profesionais”, conclúe o xurado do Premio Clara Campoamor, un recoñecemento que pon en valor a súa pegada duradeira na sociedade ourensá.