A mellora dos servizos á dependencia no rural marcou hoxe a axenda dos territorios transfronteirizos de Padrenda e Melgaço cunha intensa xornada de reunións e formación organizada polo Concello de Padrenda, o Centro Interparoquial e Social do Alto Mouro (CISAM) e Afaga Alzheimer.
A primeira reunión celebrouse en Padrenda, encabezada polo alcalde Manuel Pérez Pereira, na que ambas entidades analizaron a situación actual dos servizos sociais, as necesidades de atención á dependencia e os posibles ámbitos de colaboración.
Padrenda e Melgaço avanzan na mellora da atención á dependencia no rural
O obxectivo común pasa por reforzar e ampliar a oferta de servizos nos territorios rurais situados a ambos lados da fronteira.
Pola tarde, o protagonismo trasladouse á sede do CISAM, en Parada do Monte (Melgaço). Alí, profesionais de Afaga Alzheimer impartiron unha sesión formativa centrada no coñecemento das demencias e dos seus síntomas cognitivos, comportamentais e psicolóxicos. A formación buscou achegar ferramentas prácticas para mellorar a atención das persoas maiores dependentes do rural.
Todas estas accións intégranse no proxecto LongSocial. Este proxecto está cofinanciado pola Unión Europea a través do Programa Interreg VI-A España–Portugal (POCTEP) 2021-2027. As súas accións pretenden reforzar os servizos dirixidos ás persoas maiores no rural mediante a cooperación entre entidades sociais da fronteira. O partenariado complétano a Santa Casa da Misericordia de Melgaço e a Sociedade Galega de Xerontoloxía e Xeriatría (SGXX).