A praza da Lexión, no barrio da Carballeira, avanzará cara a unha mellor accesibilidade e unha posta en valor integral.
Esta semana aprobouse o expediente para contratar as obras do proxecto impulsado polo Concello de Ourense.
A praza da Lexión renovarase con xogos inclusivos e nova iluminación
A Xunta de Goberno Local deu luz verde a unha intervención cun orzamento de licitación de 917.488,90 euros, destinada a transformar este espazo de referencia no barrio.
O plan prevé un itinerario peonil perimetral accesible. Este conectará as dúas áreas da praza mediante un pavimento natural continuo e eliminará todos os chanzos que actualmente dificultan a mobilidade.
O proxecto tamén inclúe a renovación do valado das zonas de xogos infantís, deixando a área de xogos biosaudables e o paseo perimetral sen peches para favorecer a integración entre o parque e o exterior. Ademais, ampliarase a superficie útil da praza no lugar que agora ocupa a fonte decorativa.
Na área infantil instalaranse novos xogos, incluíndo elementos inclusivos, nun recinto valado e con pavimento de caucho para minimizar o risco de caídas. O deseño complétase cunha zona específica de xogos para persoas maiores, a recolocación e renovación dos biosaudables e a creación dunha pista regulamentaria de petanca, unha das peticións expresas da veciñanza.
A actuación rematará coa renovación integral da iluminación, coa instalación de farois LED que mellorarán a eficiencia enerxética e a seguridade deste espazo de convivencia.