O grupo municipal do PSdeG no Concello de Ourense mostrou o seu agradecemento ao goberno de Gonzalo Pérez Jácome polo interese amosado cara á proposta socialista de situar un conxunto escultórico na praza do complexo cultural de San Francisco.
O obxectivo sería identificar o espazo como lugar de memoria democrática, en lembranza das máis de cen persoas fusiladas alí durante a Guerra Civil e a ditadura franquista.
Ourense podería contar cun lugar de memoria na praza de San Francisco
O PSdeG agradece ao goberno local o interese pola proposta de instalar un conxunto escultórico que homenaxee ás vítimas da represión franquista.
No pleno ordinario celebrado este mes de agosto, o concelleiro Armando Ojea manifestou que o executivo municipal valora a posibilidade de instalar unha homenaxe que «lembre a memoria das persoas que se mantiveron fieis ao seu cargo institucional e á legalidade vixente, e que ao mesmo tempo transmita a senrazón dos asasinatos cometidos«.
Dende o PSdeG consideran que esta iniciativa responde a unha débeda histórica con Ourense e que a súa execución non debe depender unicamente da achega doutras administracións como a Deputación ou a Xunta de Galicia. Así o manifestaron logo de que Ojea deixase entrever a posible colaboración doutras entidades para financiar o proxecto.
Os socialistas lembran tamén que levan anos reclamando que se faga efectivo o acordo plenario aprobado hai sete anos para renomear o Campo de Aragón como Praza da República, en aplicación da Lei 20/2022 de Memoria Democrática. O espazo está situado entre a Biblioteca Nós, o Arquivo Histórico Provincial e a Escola Municipal de Música e Artes Escénicas, un enclave simbólico para a cidade.
Porén, a voceira municipal do PSdeG e secretaria xeral da formación en Ourense, Natalia González, lamentou que o goberno local rexeite convocar o Consello Municipal de Memoria Histórica para debater este e outros temas relacionados. “Na nosa cidade queda moito por facer, tanto pedagóxica como democraticamente, para comezar a reparar o dano causado pola Guerra Civil e o franquismo. Consideramos que unha comisión efémera, como propón o edil Armando Ojea, non será suficiente”, subliñou.