O compositor e guitarrista ourensán Daniel Minimalia presentou en primicia o seu novo videoclip, “Lyla”, un adianto do álbum “TR3ZE”, no Centro Cultural Marcos Valcárcel.
A peza audiovisual, patrocinada pola Deputación de Ourense, foi rodada na Ribeira Sacra, unha das localizacións máis simbólicas da provincia, e chegará este 28 de novembro ao resto do público.
Minimalia estrea en Ourense o videoclip “Lyla”, un tributo á Ribeira Sacra
O presidente provincial, Luis Menor, agradeceu ao artista que “sempre volva á casa” e resaltouno como “gran embaixador da nosa terra”. Destacou que este adianto supón unha “oportunidade” e un “luxo” para Ourense, ao permitir desfrutar en exclusiva dunha obra que fusiona música, paisaxe e identidade.
Menor subliñou que o autor de “TR3ZE” é “o primeiro galego en obter un galardón tan prestixioso como o Grammy Latino”. O presidente provincial definiu “Lyla” como unha promoción cultural e paisaxística sen precedentes da Ribeira Sacra.
O videoclip percorre espazos icónicos como o canón do Sil, o mosteiro de Santa Cristina, a igrexa de San Pedro de Rocas e outros escenarios de gran carga espiritual. Minimalia explicou que buscou reflectir a “mística” que lle dá personalidade á contorna e asegurou sentirse “ilusionado por levar Ourense por diante” nos seus proxectos.
Un artista ourensán de proxección internacional
Daniel Minimalia é o primeiro español en obter dous Hollywood Music in Media Awards. Na súa traxectoria acumula seis discos —Akainik (2011), Cuentos Sonoros (2012), Arenas de Luna (2014), Origen (2016), Terra (2020) e o novo “TR3ZE”— ademais do libro La Música Que Llevas Dentro (2022).
En “Lyla” (Audio Maze Music) colabora coa cantante internacional Ekaterina Shelehova, cuxa voz, asociada á súa interpretación viral “Earth Melodies” en Italia’s Got Talent (2021), combina ópera, canto ancestral e espiritualidade, aportando profundidade e atmosfera ao proxecto.
O lanzamento do videoclip precede a xira internacional que acompañará o novo álbum, con paradas en Berlín, Europa Central, Estados Unidos e Asia.