O falecemento de Antonio Rodríguez Rodríguez deixa de loito ao PSdeG-PSOE de Ourense e ao conxunto do socialismo galego, que perde unha das súas figuras máis relevantes e un referente moral para varias xeracións de militantes.
A Comisión Executiva Municipal (CEM) e a Agrupación Municipal do PSdeG-PSOE de Ourense expresaron a súa fonda dor pola perda dun compañeiro “imprescindible” na historia colectiva do partido.
O socialismo ourensán chora a perda de Antonio Rodríguez
Destacan que marcha “un socialista íntegro, honesto e profundamente comprometido cos valores da democracia, da igualdade e do servizo público”.
Antonio Rodríguez Rodríguez, nado na Peroxa en 1944, dedicou toda a súa traxectoria vital e política ao servizo da cidadanía. Mestre de vocación e socialista por convicción, caracterizouse pola firmeza das súas ideas, a claridade da súa palabra e un compromiso constante, mesmo nos momentos máis complexos da vida política galega e estatal.
Seis lexislaturas representando a Ourense nas Cortes
A súa achega institucional foi decisiva para a provincia. Durante cinco lexislaturas, entre 1979 e 1993, exerceu como deputado no Congreso pola provincia de Ourense. Este foi un período clave marcado pola transición e a consolidación democrática. Dende esa responsabilidade defendeu con determinación os intereses dun territorio que precisaba unha voz forte nas Cortes Xerais.
Posteriormente, entre 1996 e 2000, foi senador por Galicia, mantendo sempre unha vinculación directa coas comarcas ourensás e coa cidadanía. Ao longo das seis lexislaturas como parlamentario, destacou pola defensa dos sectores máis vulnerables e polo seu traballo para achegar os recursos do Estado ás necesidades reais da provincia.
Liderado orgánico e defensa do socialismo galego
No ámbito orgánico, Antonio Rodríguez asumiu responsabilidades de primeiro nivel no PSdeG-PSOE. Foi secretario xeral do partido galego entre 1982 e 1985 e posteriormente presidente até 1988. Nesas etapas, o socialismo galego reforzou a súa presenza institucional e a súa capacidade de influencia política.
Sempre exerceu o liderado dende a humildade, a escoita e a convicción de que a política debe estar ao servizo da xente. A súa acción estivo marcada pola defensa dos intereses de Ourense dentro do partido e pola conexión co rural e coas comarcas, evitando que a voz da provincia quedase diluída nas dinámicas máis centralizadas.
Un referente moral para a militancia
Para o PSdeG-PSOE, Antonio Rodríguez deixa un legado baseado na coherencia, a honestidade e a fidelidade aos valores socialistas. A súa capacidade de diálogo e a súa xenerosidade intelectual convertérono nun exemplo para varias xeracións de militantes.
El mesmo resumiu toda unha vida de compromiso nunha frase que hoxe cobra especial significado: “Morrerei sendo socialista”. Unha afirmación que, segundo destacan dende o partido, definiu a súa traxectoria ata o final.
A Executiva Provincial do PSdeG-PSOE de Ourense transmitiu as súas máis sentidas condolencias á familia, ás amizades e a toda a militancia socialista. O partido subliña que Antonio Rodríguez non se vai, porque o seu legado político e humano seguirá presente na memoria colectiva e no traballo diario pola xustiza social, a igualdade, a democracia e o amor por Galicia e Ourense.