Natalia González Benéitez resultou reelixida como secretaria xeral do PSdeG-PSOE en Ourense tras tres anos de mandato nos que a unidade, a igualdade e a conexión co sentir social foron os piares fundamentais.

Durante a asemblea extraordinaria celebrada esta mañá, destacou o reto iniciado en marzo de 2022: «percorrer as rúas, encher as prazas e loitar contra a desilusión e a desmemoria«.

Natalia González Benéitez, reelixida secretaria xeral do PSdeG-PSOE en Ourense

A dirixente destacou o esforzo por normalizar e dinamizar o partido logo de anos de enfrontamentos internos. “A pesar do sufrimento electoral e da desafección cidadá, transformamos o ruído e a división en traballo e cohesión”, afirmou.

González Benéitez puxo en valor o papel clave das mulleres e da mocidade, subliñando que «non se entende un PSOE sen feminismo, equidade e a ilusión da xuventude».

O balance do mandato reflicte máis de 250 visitas e reunións con entidades, máis de 100 actos e máis de 50 xuntanzas da Comisión Executiva Municipal (CEM). “Non hai reto máis bonito e ilusionante que ser secretaria xeral desta agrupación”, destacou agradecendo o apoio recibido.

Pola súa banda, José Ramón Fernández Morgade, secretario de Organización, continuará na nova etapa. Morgade agredeceu o compromiso da secretaria xeral destacando as accións levadas a cabo en dereitos LGTBI, cultura galega e feminismo. Tamén Miguel Gómez, líder de Xuventudes Socialistas, valorou o apoio constante á mocidade.

Natalia González Benéitez, reelixida secretaria xeral do PSdeG-PSOE en Ourense — Foto: PSdeG-PSOE

A nova Comisión Executiva Municipal foi elixida pola militancia co 97,2% dos votos. Natalia González Benéitez encabeza un equipo paritario e renovado, con Xurxo Doval Blanco como vicesecretario xeral e José Ramón Fernández Morgade mantendo o seu posto. Entre as novas caras figuran responsables de áreas como Igualdade, Sanidade, Educación, Cultura, Memoria Democrática e moitas outras, reflectindo o compromiso coas demandas sociais actuais.