A representación empresarial do sector siderometal de Ourense lamenta que, tras dúas mediacións promovidas polo Consello Galego de Relacións Laborais, non fose posible acadar un acordo que poña fin á negociación do convenio colectivo.
Segundo as empresas, acudiron ás reunións “co ánimo de chegar a un entendemento”, pero consideran que o inmobilismo da CIG e UGT fixo imposible calquera avance.
Empresas e sindicatos seguen sen acordo no convenio do siderometal
A parte empresarial lembra que, desde o inicio das conversas en xaneiro, puxo enriba da mesa un plus de asistencia por acudir ao traballo, con actualización en futuras negociacións.
Após o rexeitamento dos sindicatos, aseguran que foron modificando a oferta ata propoñer un incremento salarial do 3,5% anual durante tres anos, así como un plus de asistencia en 2027 de 444 euros (2 euros por día traballado). Engaden tamén que aceptaban incorporar unha cláusula de revisión idéntica á do anterior convenio, que permitiu pechar unha folga indefinida.
A patronal subliña que o paquete económico ofertado supón un incremento total do 13,23%, polo que consideran “incomprensible” que os sindicatos manteñan o bloqueo cando, segundo destacan, “o que eles esixen supón un 12%”. Critican tamén que os traballadores que secundaron as sete xornadas de folga convocadas por CIG e UGT desde setembro “perderon unha cantidade económica irrecuperable”.
As empresas sinalan que, de maneira voluntaria, actualizaron os salarios un 3,5% desde maio para evitar que o persoal resulte prexudicado pola falta de entendemento. Aseguran que o seu obxectivo continúa sendo “pechar un acordo canto antes”.