O Concello de Ourense abrirá o vindeiro luns, 22 de setembro, a nova oficina tributaria en internet, un espazo dixital deseñado para simplificar os trámites relacionados co pago de taxas e impostos municipais.
A través desta plataforma, accesible desde o portal web municipal, a veciñanza poderá consultar o calendario fiscal, revisar o estado dos recibos —abonados ou pendentes— e descargar xustificantes e cartas de pagamento.
Ourense activa unha nova oficina tributaria en liña
Ademais, permitirá xerar autoliquidacións de tributos, obter certificados de non ter débedas, descargar modelos de solicitudes e acceder a información sobre os obxectos tributarios asociados a cada persoa.
A oficina tamén facilitará a obtención de certificados do padrón municipal, tanto individuais como históricos, e a consulta do estado das multas. Nunha segunda fase, habilitarase tamén a posibilidade de pagar os tributos directamente en liña.
O novo servizo integra nunha única interface funcionalidades que antes estaban dispersas na sede electrónica do Concello, ao tempo que incorpora ferramentas adicionais. Quen acceda ás ligazóns antigas será redirixido automaticamente á nova oficina tributaria.