O Concello de Ourense sumouse hoxe á celebración do 25N, Día Internacional para a Eliminación da Violencia contra a Muller, cun acto institucional no salón de plenos no que se apelou á unidade social e institucional fronte a esta lacra.
A concelleira de Igualdade, Noa Rouco, leu a “Declaración institucional contra a violencia, contra quen maltrata e contra quen a nega ou relativiza”, aprobada pola FEGAMP. No acto participaron representantes municipais, entidades sociais, forzas e corpos de seguridade e membros do Consello Municipal e da Comisión de Igualdade.
Ourense reivindica o 25N cun chamamento firme contra a violencia machista
A declaración lembrou que en 2025 foron asasinadas 32 mulleres en España, dúas delas en Galicia. Tamén se recordou o asasinato de tres menores en contextos de violencia de xénero. Estes elevan a 65 o número de nenas e nenos vítimas desde 2003. Ademais, o Observatorio contra a Violencia Doméstica e de Xénero advertiu dun incremento do 5% nas denuncias en Galicia.
No manifesto, os concellos galegos subliñan a urxencia de erradicar unha violencia “estrutural na nosa sociedade”. Declaran a súa “condena rotunda a todas as formas de violencia contra as mulleres”. Afirman tamén que o negacionismo supón unha ameaza directa, xa que “desprotexe ás que sofren e debilita o compromiso social necesario para combatela”. A violencia machista, remarcan, é “un crime contra os dereitos humanos que nos empobrece como sociedade”.
Arte como vehículo para denunciar as violencias
A xornada continuou ás 13.00 horas no Edificio Xurídico Empresarial do campus de Ourense. Alí tivo lugar a inauguración dunha exposición do alumnado da Escola de Arte e Superior de Deseño Antonio Faílde, organizada en colaboración co Concello e a Universidade de Vigo.
A mostra presenta un corpo simbólico único que permite explorar as múltiples violencias que sofren as mulleres: estruturais, psicolóxicas, sexuais e obstétricas. Trátase dun relato visual co que o alumnado busca visibilizar, denunciar e defender a resistencia dos corpos disidentes, ofrecendo unha visión crítica e artística neste 25N.