O alcalde de Ourense, Gonzalo Pérez Jácome, denunciou hoxe a exclusión da cidade na resolución da convocatoria estatal de fondos FEDER para proxectos ambientais, publicada polo Ministerio para a Transición Ecolóxica a través da Fundación Biodiversidade.
O proxecto municipal “Ourense, cidade arborada”, que prevía a plantación de 5.000 árbores, quedou na lista de reserva mentres Vigo e A Coruña resultaron beneficiarias directas.
Jácome acusa ao Goberno de discriminar a Ourense nos FEDER
Jácome cualificou esta decisión como “unha mostra máis da discriminación sistemática que o Goberno central socialista exerce contra Ourense, a única gran cidade galega que non recibe estas axudas a pesar de ser a que sofre unhas condicións climáticas máis extremas”.
O rexedor criticou tamén a postura do PSOE local. “En lugar de defender os intereses da súa cidade e esixir un trato xusto, prefiren convocar consellos e órganos burocráticos para distraer a atención. Os socialistas ourensáns atacan ao seu propio Concello, mentres calan cando Madrid nos volve deixar atrás”, reprochou.
Segundo o alcalde, o Executivo estatal “prefire enviar os fondos a cidades gobernadas polo seu partido, en lugar de atender as necesidades obxectivas dunha cidade castigada polo clima máis rigoroso de Galicia e que require medidas urxentes de reforestación urbana”.
O Concello lembra que o proxecto fora avaliado de forma positiva e superara os criterios técnicos, pero finalmente quedou excluído. “Un novo agravio que se suma á longa listaxe de discriminacións que sofre Ourense por parte dun Goberno que se enche a boca de falar de cohesión territorial, mentres condena a nosa cidade ao esquecemento”, concluíu Pérez Jácome.