O Concello de Ourense conseguiu unha subvención histórica de 8,7 millóns de euros, achega que permitirá executar proxectos clave de mobilidade, infraestruturas e medio ambiente.
O alcalde, Gonzalo Pérez Jácome, anunciou esta mañá no Pleno de outubro a concesión destes fondos, procedentes do Plan EDIL do Goberno estatal con cargo ao programa FEDER.
Ourense recibe 8,7 millóns en fondos FEDER para mobilidade e medio ambiente
Entre as actuacións previstas destacan a humanización das rúas Doutor Fleming e Bonhome. Tamén se realizará a instalación de ramplas mecánicas na Rampla de Sas e na rúa Vasco Díaz Tanco, a posta en marcha dun elevador en Amor Ruibal e o proxecto “Rúas verdes”, orzamentado en dous millóns de euros. Tamén se inclúe a renovación da iluminación pública, cun investimento dun millón de euros.
Jácome cualificou a achega como “unha das de maior contía da historia do Concello” e subliñou a importancia das obras que se levarán a cabo. “Quedamos moi arriba para a poboación que temos, o que reflicte a calidade do proxecto presentado polo Concello”, destacou.
A resolución provisional, datada o 1 de outubro, establece que Ourense recibirá 8.730.304 euros. Esta cantidade supón o 60% do custo total dun plan orzamentado en 14,5 millóns.
O plan “Ourense verde e conectado”
O programa municipal preséntase baixo o título “Ourense verde e conectado” e abrangue 11 actuacións agrupadas en dous proxectos:
- Ourense conectada: humanización das rúas Doutor Fleming e Bonhome, melloras de mobilidade vertical en Sas, Amor Ruibal e Vasco Díaz Tanco, así como un programa socio-cultural de cohesión.
- Ourense verde, rúas verdes: iniciativas de renaturalización, creación de percorridos verdes, prazas con sombra e máis biodiversidade, mellora da accesibilidade e áreas infantís, ademais de programas de carácter ambiental e saudable para os barrios.
Con esta achega, Ourense dá un paso decisivo cara a un modelo urbano máis sostible, accesible e respectuoso co medio ambiente.