O Concello de Ourense destinará 24,19 millóns de euros do remanente de tesouraría para regularizar os contratos da auga e da limpeza viaria.
A proposta, aprobada esta mañá pola Xunta de Goberno Local en sesión extraordinaria, será levada ao pleno municipal o vindeiro 27 de outubro para a súa aprobación definitiva.
O Concello de Ourense destina 24 millóns á regularización de contratos
O goberno local explica que o obxectivo desta modificación orzamentaria é poñer fin a conflitos históricos coas concesionarias Viaqua (auga, saneamento e depuración) e Ecourense (recollida de lixo e limpeza viaria), que operaban en precario dende hai anos.
Os acordos acadados recoñecen contías sensiblemente inferiores ás reclamadas inicialmente polas empresas.
Distribución dos créditos
Os fondos aprobados repártense do seguinte xeito:
- Xestión da EDAR de Reza, Santa Cruz Arrabaldo e As Coiñás: 1.777.611,53 €
- Tanques de tormenta: 260.189,43 €
- Servizo de auga, saneamento e depuración: 13.607.117,48 €
- Recollida de lixo e limpeza viaria: 8.547.462,91 €
Contratos en precario
O contrato de Ecourense está en precario dende abril de 2022, o que xerou un desfase entre os custos reais e as retribucións vixentes. No caso de Viaqua, a situación arrástrase dende 2017, cando o contrato quedou desactualizado pola posta en marcha de novas infraestruturas como a EDAR de Reza ou os tanques de tormenta.
O Concello recoñece a débeda pola prestación continuada do servizo ata 2023, cunha compensación inferior aos máis de 18 millóns reclamados inicialmente pola empresa. Ademais, Viaqua comprométese a executar melloras na rede de auga por valor de 1,9 millóns de euros.
Nova ordenanza fiscal
Na mesma sesión, a Xunta de Goberno Local deu luz verde ao proxecto dunha nova ordenanza fiscal que derrogará as actuais taxas de subministración de auga e saneamento. A súa entrada en vigor producirase unha vez se aprobe a nova normativa reguladora das tarifas destes servizos, actualmente en tramitación.