O PSdeG-PSOE de Ourense súmase á manifestación convocada pola plataforma sanitaria de Valdeorras, O Bolo e Trives este sábado 22 de novembro, que partirá ás 18:00 horas das portas do hospital comarcal de Valdeorras.
Os socialistas denuncian a precariedade dos servizos de saúde na zona e destacan que a veciñanza destas comarcas “non son cidadáns de segunda e merecen unha atención sanitaria digna e igual á do resto de Galicia”.
O PSOE únese á manifestación en Valdeorras por unha sanidade digna en Ourense
Dende o PSOE ourensán explican que estas comarcas contan cunha poboación moi envellecida e núcleos dispersos, o que complica o acceso á atención médica. Nos últimos meses, centros de saúde do Bolo, A Veiga ou Rubiá perderon aos seus médicos titulares, e en varias localidades as ausencias non se están cubrindo, obrigando á veciñanza a percorrer decenas de quilómetros para recibir atención noutros concellos.
“As listas de agarda son cada vez máis longas, retrasando diagnósticos e afectando gravemente aos pacientes, a maioría persoas de idade avanzada con enfermidades crónicas”, denuncian os socialistas. Engaden que esta situación responde a unha grave falta de persoal, que o goberno autonómico de Alfonso Rueda non está a corrixir. Segundo o PSdeG-PSOE, “entre a non cobertura de prazas, os recortes e o desmantelamento de servizos, o PP está a dar un golpe mortal á sanidade no oriente ourensán”.
Hospital comarcal en risco de reconversión
O PSdeG-PSOE tamén alerta sobre a situación do hospital comarcal de Valdeorras, que segundo os socialistas o PP pretende reconvertir nun PAC ou nun simple centro de saúde, pese a ser un epicentro da atención sanitaria na comarca. Nos últimos anos, o hospital perdeu servizos fundamentais como uroloxía e viu como se recortaban outros como rehabilitación, oftalmoloxía, radioloxía ou traumatoloxía.
Os socialistas destacan a negativa do PP a crear servizos de neumoloxía e xeriatría, imprescindibles nunha das poboacións máis envellecidas de Galicia. Tamén sinalan a recente falla de funcionamento da incubadora de traslado neonatal, vital para garantir a seguridade dos recén nados que precisen derivación a Ourense ou outro hospital de referencia. Reivindican solucións inmediatas para xinecoloxía-obstetricia e fin ao desmantelamento do paridoiro, que actualmente obriga a derivar partos a Ourense.
“A situación da sanidade no oriente ourensán é un exemplo do desleixo da Xunta e do PP, acumulando máis de 10 anos de recortes continuados e falta de planificación”, subliñan.
O PSdeG-PSOE anima á veciñanza de Valdeorras, Trives e Viana a sumarse á manifestación e confirma que alcaldes, concelleiros, deputadas e militantes representarán ao partido no acto, reforzando a súa aposta por unha sanidade digna e equitativa no oriente da provincia.