A Xunta de Goberno Local de Ourense celebrou esta mañá unha sesión extraordinaria na que aprobou, como único punto da orde do día, a declaración de urxencia dos expedientes de contratación vinculados coa posta en marcha da Zona de Baixas Emisións (ZBE) Ourense Centro.
Esta decisión ten como obxectivo axilizar a implantación dun sistema que permitirá regular o tráfico na zona central da cidade, así como desenvolver accións de control da calidade do aire e do ruído.
Ourense acelera a implantación da Zona de Baixas Emisións con trámites de urxencia
Entre as actuacións previstas inclúese a creación dunha Oficina de Información e Atención ao Cidadán específica para a ZBE e o lanzamento dunha campaña de comunicación pública que permita informar á veciñanza sobre a nova normativa e os seus efectos.
Os contratos relacionados con este proxecto contan cunha financiación parcial procedente dos fondos europeos Next Generation EU, no marco do Plan de Recuperación, Transformación e Resiliencia, mediante unha axuda outorgada polo Ministerio de Transportes e Mobilidade Sostible.
A declaración de urxencia destes trámites resulta esencial para garantir a posta en marcha da ZBE en tempo e forma, nunha iniciativa que busca mellorar tanto a calidade ambiental como a mobilidade urbana na cidade.
