Leire Carrera e Yago Nguyen Rodríguez, do Judo e Jiu Jitsu Club Marbel de Ourense, acadaron dúas medallas no Torneo Nacional de Jiu Jitsu ‘Memorial Patricia Martín Blanco’.
Este torneo celebrouse o pasado sábado 21 de xuño no pavillón homónimo da localidade madrileña de Parla.
Ouro e prata para o Jiu Jitsu Club Marbel en Parla
A deportista ourensá Leire Carrera, que regresaba tras superar unha lesión, proclamouse campioa na categoría de -57 kg en Lucha sénior feminina, demostrando un excelente estado de forma. Pola súa banda, Yago Nguyen Rodríguez conseguiu a prata na categoría masculina de -85 kg, cunha actuación moi destacada.
Os ourensáns brillaron no Torneo Nacional ‘Memorial Patricia Martín Blanco’.
O adestrador do club, Felipe Iglesias —subcampión mundial e seleccionador galego— valorou os resultados como “fantásticos” e destacou que o equipo “mantén a excelente liña de rendemento dun último mes repleto de acontecementos”.
Completaron a participación ourensá os árbitros Luis e Rubén Córdoba, que tamén tomaron parte activa na competición, contribuíndo ao prestixio do club nun evento de referencia a nivel estatal.
