O Plan de Actuación Integrado Ourense Sur avanzou hoxe un paso decisivo coa súa presentación na Deputación de Ourense, nun acto no que o subdelegado do Goberno, Eladio Santos, destacou o compromiso coa transformación urbana e medioambiental dos Concellos da provincia, independentemente do seu tamaño.
Santos explicou que o Plan EDIL, xestionado polo Ministerio de Facenda e financiado a través do FEDER 2021-2027, busca impulsar o desenvolvemento sustentable desde unha perspectiva medioambiental, económica e social.
O Goberno financia con 4,3 millóns o PAI Ourense Sur
A agrupación de Concellos encabezada por Barbadás, coa colaboración da Deputación, acadou 4.365.152 euros na convocatoria deste ano, unha cifra que permitirá activar iniciativas dirixidas a mellorar a calidade de vida e abrir novas oportunidades no territorio.
O subdelegado salientou que, “unha vez máis, o Goberno de España cumpre con Ourense, con financiamento para desenvolver ideas ambiciosas e xerar oportunidades económicas e de emprego”. Tamén felicitou aos Concellos implicados por deseñar un proxecto innovador e orientado á cidadanía. Segundo apuntou, “a colaboración entre Administracións é fundamental para crear municipios modernos e con oportunidades nos que a xente queira quedar a vivir”.
A nivel provincial, a apertura dos fondos FEDER aos municipios de menos de 20.000 habitantes permitiu que 23 Concellos accedesen a un investimento global de 22 millóns de euros. Ademais do PAI encabezado por Barbadás, o Concello de Ourense logra 8.730.304 euros, mentres que as agrupacións lideradas por Verín e O Barco de Valdeorras reciben 4.365.152 euros cada unha.