Ourense terá un novo parque canino no barrio de Barrocás, unha infraestrutura impulsada pola Xunta e o Concello que busca mellorar o benestar animal.
O alcalde de Ourense, Gonzalo Pérez Jácome, e a conselleira de Medio Ambiente e Cambio Climático, Ángeles Vázquez Mejuto, asinaron esta mañá na Sala Valente o protocolo de colaboración que permitirá executar esta actuación.
O barrio de Barrocás acollerá o primeiro gran parque canino da cidade
Este novo equipamento emprazarase no Parque Angelita Paradela, nunha parcela de 2.100 metros cadrados cedida polo Concello.
As obras serán realizadas pola Xunta de Galicia, mentres que o Concello asumirá o mantemento e conservación do recinto. A previsión é que os traballos comecen en xaneiro de 2026 e o parque poida abrir na primavera dese mesmo ano.
Durante o acto, a conselleira Ángeles Vázquez salientou que Ourense é unha das cidades galegas con maior presenza de mascotas. “Hai 18.517 cans rexistrados, o que significa que un de cada cinco ourensáns ten un animal de compañía”, destacou. Subliñou ademais que o novo parque estará valado e dotado de zonas de xogo e socialización, con fontes bebedeiro, mobiliario urbano e bancadas para o descanso das persoas acompañantes.
Pola súa banda, Gonzalo Jácome agradeceu a colaboración da Xunta e recalcou que o proxecto se situará “nun espazo clave a nivel residencial, como é o barrio de Barrocás”. Neste espazo tamén está previsto o inicio das novas piscinas públicas municipais.
O alcalde avanzou que o Concello planea acondicionar un segundo parque canino de tipo fluvial na contorna do Miño. Para este proxecto espera contar novamente coa cooperación autonómica. Ademais, lembrou que ambas administracións colaboran xa no primeiro refuxio climático da cidade. Pérez Jácome aproveitou para reiterar o seu desexo de sumar apoios institucionais ao proxecto de plantación de 10.000 árbores en Ourense, unha iniciativa orientada a incrementar as zonas verdes urbanas.