O Campo Municipal de Oira acollerá o xoves 23 de outubro, ás 19:30 horas, a quinta edición do Partido Benéfico contra o Cancro de Mama, coincidindo coa conmemoración do Día Mundial desta enfermidade.
Baixo o lema “Tomámolo a peito”, a iniciativa quere visibilizar o que realmente significa convivir co cancro de mama máis alá do diagnóstico e do tratamento. A campaña foi cocreada e protagonizada por pacientes, sobreviventes e o seu contorno, que reclaman máis comprensión social e menos simplificación mediática.
Oira acollerá o V Partido Benéfico contra o cancro de mama
O encontro enfrontará aos equipos Escola de Fútbol Feminino Rosalía e Mulleres de Ourense. As entradas teñen un prezo simbólico de 5 euros, e a recadación íntegra destinarase á investigación contra o cancro de mama. Ademais, no descanso realizaranse sorteos grazas ás doazóns de empresas colaboradoras. O partido poderá seguirse en directo a través do canle de YouTube do EFF Rosalía, o que permite participar tamén a quen non poida asistir.
As entradas xa están dispoñibles na sede provincial da Asociación en Ourense (rúa Doutor Marañón, 21-baixo), na oficina da Asociación no CHUO, na sede do EFF Rosalía (rúa San Silvestre), no Ourense CF, na Cafetería Pabellón, así como en oficinas e representantes dos grupos municipais. Tamén se habilitou unha fila cero para doazóns a través da conta de ABANCA: ES68 2080 0475 5630 4000 0077.
Na presentación oficial participaron representantes do Concello, Deputación e Xunta, xunto co club EFF Rosalía, a Asociación contra o Cancro e xogadoras dos dous equipos. O evento amosou a unidade da sociedade ourensá na loita contra esta enfermidade.
Colaboracións con este evento solidario
O partido conta co apoio de múltiples entidades e empresas locais como Concello e Deputación de Ourense, Xunta de Galicia, Consello Municipal de Deportes, Ourense CF, Grupo Cuevas, Leticia Celaá Beauty Lounge, Turbo Centro de Adestramento, Alar Centro, Farma Laura, Escuela Hapkido, Restaurante Tizar Gourmet e Club Voleibol San Martiño.
