Tres conxuntos do Pavillón Ourense e da Escola Pavillón representarán a Ourense en Castellón logo de destacar nos controis clasificatorios celebrados o sábado 18 de outubro no Pavillón dos Remedios.
As ximnastas ourensás competiron para acadar praza na Copa Base Individual, na III Fase da Copa de España de Conxuntos Élite e no Campionato Galego de Conxuntos Base.
Ourense asegura presenza en Castellón con tres equipos do Pavillón
Na xornada de mañá, tres conxuntos élite do Club Ximnasia Pavillón Ourense buscaban a súa clasificación para Castellón. As infantís —Claudia, Carla, Lara, Bianca e Olga— acadaron a segunda posición e lograron a praza para a III Fase da Copa de España, que se celebrará o 23 de novembro.
Na categoría sénior a competencia foi especialmente dura con seis conxuntos galegos en liza. O equipo sénior P (Martina, Sheila, Xisela, Daniela, Maya e Gretel) amosou un gran nivel e rematou terceiro. O sénior M (Candela, Noa, Laura, Claudia e Mariña) quedou quinto.
As ximnastas do Pavillón afrontarán agora unha intensa recta final de tempada. Algunhas das citas máis destacadas son o Euskalgym (Bilbao, 2 de novembro) e o Campionato Galego de Conxuntos Élite (Vigo, 9 de novembro).
A Escola Pavillón tamén acada o pase
No Campionato Galego de Conxuntos Base, a Escola Pavillón presentou dous equipos que tamén se clasificaron para o Nacional. O conxunto alevín —Area, Alicia, Valeria R., Valeria V., Mara e Martina— logrou un meritorio quinto posto nunha semana marcada polas lesións.
Pola súa banda, o equipo xuvenil (Rubén, Karol, Danna, Naia, Leire e Carlota), recén ascendido á categoría nacional, conseguiu remontar tras un primeiro pase con erros. O excelente nivel amosado no segundo, garantiu a súa clasificación.
Estes dous conxuntos participarán tamén no Euskalgym (1 e 2 de novembro en Bilbao) antes de viaxar a Castellón para o Nacional de Conxuntos Base, que terá lugar do 19 ao 22 de novembro.