Pazolandia 2025 volverá a Ourense o vindeiro 26 de decembro, coa apertura das portas prevista para as 11.00 horas.
Dará inicio ese día unha nova edición dun dos eventos de lecer infantil máis esperados do Nadal na provincia de Ourense.
Pazolandia 2025 abre o 26 de decembro en Ourense
A organización confirmou que se manteñen os prezos da edición anterior, cun custo de 5,00 euros por persoa, en modalidade de entrada única para nenos e nenas a partir dos 12 meses.
📅 Calendario de apertura
Pazolandia abrirá as súas instalacións do 26 de decembro ao 4 de xaneiro, ambos incluídos, aínda que permanecerá pechada o 31 de decembro durante toda a xornada e o 1 de xaneiro pola mañá.
⏰ Horarios e sesións
O recinto contará con dúas sesións diarias:
- Sesión de mañá, de 11.00 a 14:00 horas
- Sesión de tarde, de 17.00 a 20:00 horas
Durante o proceso de compra das entradas, as persoas usuarias deberán seleccionar previamente a data e o horario ao que desexan asistir, co obxectivo de garantir unha mellor organización e control de aforo.
Con esta nova edición, Pazolandia consolídase como unha das principais propostas de lecer familiar do Nadal en Ourense. Ofrecerá actividades pensadas para o público infantil durante as vacacións escolares.