Podemos Ourense presentou unha denuncia formal ante a Inspección de Traballo e Seguridade Social para reclamar que o Concello de Ourense garanta a seguridade, formación e equipamento da Policía Local.
A acción chega tras a recente sentenza do Xulgado do Social nº 1 de Ourense, que recoñece a existencia de “situacións de risco relevante” para a integridade física dos axentes debido á ausencia de equipos de protección e protocolos axeitados.
Podemos Ourense denuncia a falta de seguridade na Policía Local
O portavoz de Podemos Ourense, Francisco Diéguez, lembrou que hai unhas semanas xa solicitaran ao Concello a dotación de material de protección sen obter resposta. “Non podemos permitir que os axentes sigan traballando sen chalecos, escudos ou walkie-talkies que lles permitan protexer as súas vidas e garantir a seguridade da cidadanía. Esiximos tamén que se lles pague o que lles corresponde”, subliñou.
A denuncia solicita que a Inspección de Traballo verifique tanto a dispoñibilidade de equipos e protocolos de actuación como o pago íntegro dos salarios. Na reclamación están incluídas pagas extras e complementos. Desde a formación morada insisten en que esta situación afecta non só ao persoal policial, senón tamén á seguridade da veciñanza de Ourense. Por este motivo reclaman ao alcalde Gonzalo Pérez Jácome que cumpra coas obrigas legais en prevención de riscos laborais.